jugendsession.ch: L'andament

Arrivada

Ensemen cun 199 auters giuvenils da l'entira Svizra arrivas ti a la staziun da Berna. Silsuenter elavuras ti en tia gruppa da lavur ina pretensiun davart il tema che ti has tschernì. Tai spetgan ils proxims quatter dis discussiuns interessantas, inscunters enritgints ed in program accumpagnant divertent.

1

Gruppas da lavur

Mintga gruppa da lavur tracta in tema da la sessiun dals giuvenils. Tut tenor tia lingua materna fas ti part d'ina gruppa da lingua tudestga, franzosa u taliana. En la gruppa da lavur discutais vus voss tema e ti pos far dumondas, exprimer tias ideas e tes giavischs. In:a expert:a ed in:a parlamentari:a sustegna la gruppa cun infurmaziuns e tips. Da la discussiun sa resulta a la fin vossa pretensiun politica davart voss tema.

2

Elavurar las pretensiuns

Tge furma vuls ti dar a tia pretensiun e co vuls ti formular ella? Ti stos ta cunvegnir cun tia gruppa da lavur per pudair rediger a la fin il text che vegn suttamess al plenum per la votaziun. Attenziun: formulescha a moda clera ed uschia che tes pleds fan senn!

3

Plenum d'avertura e propostas da modificaziun

La sonda è l'avertura uffiziala da la sessiun dals giuvenils en la sala dal Cussegl naziunal. Silsuenter returnas ti en tia gruppa da lavur, nua che vus survegnis ina survista da tut las pretensiuns elavuradas da las autras gruppas. Vus discutais, schebain vus essas d'accord cun las formulaziuns u sche vus vulais far ina proposta da modificaziun per tschertas pretensiuns.

4

Plenum

Il punct culminant da la Sessiun federala dals giuvenils spetga tai la dumengia en il plenum, nua che ti pos participar a las discussiuns politicas. En la sala dal Cussegl naziunal preschentas ti vossa pretensiun a las autras participantas ed als auters participants e taidlas las propostas da modificaziun. Il plenum decida silsuenter en ina votaziun tge pretensiuns che vegnan tractadas vinavant. Forsa vegn gea era tia pretensiun surdada a la fin a la presidenta u al president dal Cussegl naziunal?

5

Lobbying

Uschespert che las pretensiuns èn vegnidas surdadas al parlament, cumenza la lavur dal forum da la sessiun dals giuvenils. Las voluntarias ed ils voluntaris dal forum s'engaschan per far visiblas las pretensiuns deliberadas. En num da la sessiun dals giuvenils fan els lobbying tar las parlamentarias ed ils parlamentaris, ma era tar differentas organisaziuns naziunalas e regiunalas. Vuls ti era far lobbying activ per tia pretensiun? Era ti pos daventar ina part dal forum e cun in zichel fortuna chattan era tias ideas buna accoglientscha en il parlament.

6

Organisar la proxima sessiun dals giuvenils

Ti na vuls betg mo sentir quatter dis atmosfera politica, mabain vulessas il pli gugent gist gidar ad organisar la proxima sessiun dals giuvenils? Alura daventa commembra u commember dal comité d'organisaziun da la sessiun dals giuvenils. Là pos ti preschentar tias ideas per la proxima ediziun e gidar ad organisar ella.

7