Il project

Ina constellaziun nunusitada en la Chasa federala: la giuventetgna discurra e las parlamentarias ed ils parlamentaris taidlan. Quai è la Sessiun federala dals giuvenils. Durant quatter dis surlaschan las politicras ed ils politichers lur plazs als giuvenils. E quels din tge che muventa els – e tge ch'els vulan muventar.

En il rom da la Sessiun federala dals giuvenils survegnan 200 giuvnas e giuvens da l'entira Svizra mintg'onn l'occasiun da vegnir activs politicamain durant quatter dis e d'exprimer lur opiniuns. S'annunziar per quell'occurrenza gratuita pon tut ils giuvenils tranter 14 e 21 onns – independentamain da la lingua, furmaziun u appartegnientscha ad ina partida. Ils plazs per la sessiun dals giuvenils vegnan repartids en ina procedura da tscherna che duai garantir ina represchentaziun uschè cumplessiva sco pussaivel dals giuvenils en Svizra. Nus vulain ultra da quai pussibilitar in access a la participaziun dals giuvenils e dar ad els in'invista en la politica svizra, independentamain da lur experientschas politicas.

La sessiun dals giuvenils n'è damai betg mo in'occurrenza annuala, mabain in dals pli gronds projects participativs per e da giuvenils en Svizra. Var 30 voluntarias e voluntaris giuvens s'engaschan durant l'entir onn per la sessiun dals giuvenils e collavuran en dus gremis: il comité d'organisaziun realisescha la proxima sessiun dals giuvenils ed il forum fa lobbying per las pretensiuns elavuradas.

La sessiun dals giuvenils vul promover la citoyenneté da las giuvnas e dals giuvens en Svizra, pia dar ad els l'occasiun da sa participar a la discussiun, da gidar a concepir l'avegnir e da cundecider.

Ein Blick , eine Session