Istorgia

2023

L'introducziun d'in Di naziunal da las naziunalitads, l'examinaziun dals pretschs da medicaments u la creaziun d'in fond per sustegnair la scolaziun e la furmaziun supplementara: quai èn be intginas da las pretensiuns ch'èn vegnidas formuladas durant la Sessiun dals giuvenils 2023 e surdadas al president dal Cussegl naziunal Martin Candinas. Ulteriurs puncts culminants da questa sessiun èn stads il pled d'avertura da la cussegliera federala Elisabeth Baume-Schneider ed il program accumpagnant multifar.

Dapli infurmaziuns (en tudestg)

2022

Introducir ina procedura da natiralisaziun unitara, infurmar meglier la populaziun davart la donaziun d'organs e refurmar la segunda pitga dal provediment per la vegliadetgna: quai èn intginas da las pretensiuns ch'ils giuvenils han surdà en il rom da la Sessiun federala dals giuvenils 2022 a la presidenta dal Cussegl naziunal Irène Kälin. Igl è stà ina Sessiun dals giuvenils 2022 plain eveniments che ha puspè gì lieu suenter trais onns en sia furma oriunda.

Dapli infurmaziuns (en tudestg)

2021

Smetter fin il 2030 cun tut ils sgols naziunals en Svizra, integrar en il plan d'instrucziun ina furmaziun obligatorica areguard in svilup persistent, garantir ina plazza da finanzas che fa mo investiziuns persistentas e definir il greenwashing: quai èn intginas da las ideas per lur visiun d'in avegnir persistent ch'ils giuvenils han surdà en il rom da la 30avla Sessiun dals giuvenils al president dal Cussegl naziunal Andreas Aebi. Igl è stada ina Sessiun dals giuvenils 2021 plain variaziun, marcada d'in festival politic e d'in revair cun la sala dal Cussegl naziunal suenter in'absenza da dus onns.

Dapli infurmaziuns (en tudestg)

2020

Ils 7 da november 2020 ha gì lieu la 29avla Sessiun federala dals giuvenils, online ed en furma reducida. Tuttina ha la Sessiun dals giuvenils divertì las participantas ed ils participants: ellas ed els han pudì far interessantas discussiuns politicas cun persunalitads politicas, han gì bleras chaschuns d'interagir e pudì participar a differents lavuratoris.

Dapli infurmaziuns (en tudestg)

2019

Il futur n'è betg tuttina! Declerar ils effects per il clima sin products, sancziunar interpresas en cas da pajas inegualas e subvenziunar las medias – quai èn las pretensiuns las pli impurtantas da la Sessiun federala dals giuvenils 2019. Ina giada dapli han las giuvnas participantas ed ils giuvens participants mussà lur voluntad e lur abilitad da participar e d'esser burgaisas activas e burgais activs – da la via en Chasa federala.

Dapli infurmaziuns (en tudestg)

2018

Cun il slogan "Ina nova fatscha per la politica" èn las participantas ed ils participants da la Sessiun dals giuvenils 2018 sa fatschentads tranter auter cun ils giuvenils queer, cun la transparenza d'interpresas e cun il rument d'emballadis en il commerzi en detagl.

Dapli infurmaziuns (en tudest)

A Childhood Summer

2017

Renovar e consolidar: quai è stà en il center il 2017. Suenter in onn plain innovaziuns hai gì num il 2017 da francar las novas acquisiziuns.

Dapli infurmaziuns (en tudestg)

2016

Il 2016 ha la Sessiun federala dals giuvenils festivà ses giubileum da 25 onns. Per questa occasiun han voluntarias e voluntaris da la Sessiun dals giuvenils fatg in film da giubileum ensemen cun la reschissura Morena la Barba. En pli è il giubileum vegnì festivà commensuradamain cun in'exposiziun, in quiz ed ina turta d'anniversari.

Dapli infurmaziuns (en tudestg)

2015

Il 2015 ha la Sessiun dals giuvenils fatg in pass concret per esser pli persistenta. Grazia a la collavuraziun cun "Squeasy" avain nus pudì sbassar il consum da PET sin prest nulla!

Dapli infurmaziuns (en tudestg)

2014

Dumondas ecologicas han gia occupà pliras giadas las participantas ed ils participants da la Sessiun dals giuvenils. Er il 2014 han els deliberà duas petiziuns cunter il sfarlattim da mangiativas.

Dapli infurmaziuns (en tudestg)

2013

Suenter che la Sessiun dals giuvenils è vegnida partida ils ultims dus onns en duas gruppas ch'èn s'inscuntradas en differents lieus en Svizra, èn s'entupads quest onn ils 200 giuvenils per l'emprima giada durant quatter dis a Berna.

Dapli infurmaziuns (en tudestg)

2012

Curt suenter l'intensificaziun dal concordat cunter ils hooligans l'onn 2012 è la Sessiun dals giuvenils sa fatschentada cun il tema violenza da fans ed è vegnida a la conclusiun ch'il diever d'objects pirotecnics na saja nagin «cumportament violent».

Dapli infurmaziuns (en tudestg)

2011

Per il giubileum da 20 onns da la Sessiun dals giuvenils han ins organisà in PolitBuskers: politicras giuvnas e politichers giuvens han gì la chaschun da sa mesirar in cun l'auter sin trais tribunas en tut la citad en il rom da debattas e da rundas da discussiun.

Dapli infurmaziuns (en tudestg)

2010

Quai n'hai anc mai dà: il 2010 ha l'assamblea plenara deliberà per l'emprima giada ina pretensiun senza cuntravusch. Migrantas e migrants minorens nunaccumpagnads duain profitar da proceduras pli sveltas senza che la qualitad pateschia.

Dapli infurmaziuns (en tudestg)

2009

Curt suenter la fin da la show da casting svizra «MusicStar» ha gì lieu a Berna la show da casting politica sut il motto «PolitStars». Damain applaus han ils giuvenils fatg per las petiziuns: per l'emprima giada ha l'assamblea plenara finala sbittà dapli petiziuns che quai ch'ella ha approvà.

Dapli infurmaziuns (en tudestg)

2008

Il 2008 ha gì lieu ultra da la Sessiun federala dals giuvenils tradiziunala gia a chaschun da la sessiun da stad resp. d'enviern dal parlament mintgamai ina sessiun d'in di. En pli han ins surdà per l'emprima giada il Prix Jeunesse.

Dapli infurmaziuns (en tudestg)

2007

Cunquai che la transfurmaziun da la Chasa federala ha duvrà pli ditg, è la sala dal Cussegl naziunal stada a disposiziun mo la dumengia. Senza ponderar ditg han ils giuvenils perquai fatg las debattas da la sonda sin la Plazza federala.

Dapli infurmaziuns (en tudestg)

2006

Il 2006 ha la Sessiun dals giuvenils stuì guntgir en il Grischun: pervia da la renovaziun da la Chasa federala è la Sessiun dals giuvenils sa radunada a Laax, parallelamain cun ils cussegls federals.

Dapli infurmaziuns (en tudestg)

2005

Il tema «Terrorissem e medias» ha procurà il 2005 per discussiuns dispitaivlas. Er intginas pretensiuns da la Sessiun dals giuvenils èn stadas cuntraversas, sco per exempel l'aboliziun da l'armada e la furmaziun parallela d'ina protecziun civila per cas da catastrofas.

Dapli infurmaziuns (en tudestg)

2004

«HEALTHvetia». Quai è stà il motto da la Sessiun dals giuvenils 2004, a la quala ils giuvenils èn s'exprimids per dapli participaziun a la politica da sanadad internaziunala.

Dapli infurmaziuns (en tudestg)

2003

Ils numerus piercings dals giuvenils èn ina nova sfida per ils detecturs da metal da la controlla da segirezza en la Chasa federala. La cussegliera federala Ruth Metzler visita pliras gruppas da lavur.

Dapli infurmaziuns (en tudestg)

2002

Dus commembers ed ina commembra dal Cussegl federal èn preschents a l'indeschavla Sessiun dals giuvenils. Il 2002 han ins en pli empruvà per l'emprima giada il concept «JuSe direct» – e quai cun success cumplain.

Dapli infurmaziuns (en tudestg)

2001

Diesch onns suenter l'emprima Sessiun dals giuvenils è il tema principal danovamain stà l'adesiun da la Svizra ad in'organisaziun supranaziunala. La discussiun al podium cun Ulrich Schlüer, Christine Beerli e Joseph Deiss ha procurà per vivs discurs.

Dapli infurmaziuns (en tudestg)

2000

En vista a l'effect minim da las petiziuns e da las resoluziuns da la Sessiun dals giuvenils han ils giuvenils decis da fundar in nov organ: il Forum. Anc il medem mais è il Forum vegnì en acziun per l'emprima giada cun grond success.

Dapli infurmaziuns (en tudestg)

1999

Confurm al motto «communicaziun» han ins per l'emprima giada emess online la Sessiun dals giuvenils 1999. En pli han ils giuvenils pretendì dal Cussegl federal d'endrizzar ina plattafurma d'infurmaziun en l'internet, per ch'ils giuvenils possian s'infurmar davart il sistem politic.

Dapli infurmaziuns (en tudestg)

1998

«Solidaritad» – quai è stà il tema central da la setavla Sessiun dals giuvenils. Gia durant il pled d'inauguraziun ha la cussegliera federala Ruth Dreifuss admonì las persunas preschentas «da tegnair avert las portas per minoritads, persunas da l'exteriur e persunas senza lavur».

Dapli infurmaziuns (en tudestg)

1997

Il 1997 han ins schlargià il concept da la Sessiun dals giuvenils; per l'emprima giada han ins organisà Sessiuns dals giuvenils regiunalas en sis citads svizras. Puspè han ils giuvenils pretendì cun gronda maioritad d'aderir a l'UE.

Dapli infurmaziuns (en tudestg)

1996

En il rom dal tema "Giuventetgna dependenta" han ils giuvenils pretendì da legalisar products da cannabis e da far dapli lavur da prevenziun. Sco raschun per il consum da drogas han ils giuvenils identifitgà la mancanza da segirtad e d'integraziun en la «societad da consum e da prestaziun dad oz».

Dapli infurmaziuns (en tudestg)

1995

«Jau sun surstà da la spontanitad, da las pretensiuns realisticas e da las abilitads impressiunantas dals giuvenils. Era lur moda d'argumentar m'ha tutgà. Era sch'els èn pli realistics ch'ils giuvenils dals onns 1970, n'han els betg pers lur idealissem», ha ditg cusseglier federal Arnold en in'intervista. La Sessiun dals giuvenils pretenda l'adesiun a l'UE sco er il dretg da votar e d'eleger per persunas da l'exteriur che vivan en Svizra.

Dapli infurmaziuns (en tudestg)

1994

En il rom dal tema «Giuventetgna e clima – betg mo pleds ...» ha la Sessiun dals giuvenils survegnì da l'UFAGC (oz UFAM) CHF 30'000 per sustegnair projects concrets en favur da la protecziun dal clima. Da quai è resultà tranter auter in project da plantaziun a Costa Rica.

Dapli infurmaziuns (en tudestg)

1993

Planisada oriundamain mo sco occurrenza singulara, ha gì lieu ils 4 da december 1993 la segunda Sessiun dals giuvenils. La pretensiun centrala è stada ina petiziun cun 6000 suttascripziuns surdada als cussegls per installar in parlament da giuventetgna permanent.

Dapli infurmaziuns (en tudestg)

1991

A chaschun dal Giubileum da 700 onns Confederaziun helvetica ha la Sessiun dals giuvenils gì lieu l'emprima giada il settember 1991. Il punct culminant: la discussiun cun Flavio Cotti, president da la Confederaziun.

Dapli infurmaziuns (en tudestg)