Las finamiras da la Sessiun da giuvenils

La Sessiun dals giuvenils sco portavusch politica da la giuventetgna

La Sessiun dals giuvenils s'engascha per pussibilitar a giuvenils da sa participar activamain a la vita politica e da vegnir prendids serius sco vusch politica. La participaziun è gratuita, il Forum tegna en egl las pretensiuns e procura ch'il parlament las elavuria. La Sessiun dals giuvenils sa sviluppa confurm al temp e porscha als giuvenils che prendan part adina dapli meds da participaziun digitals. Senza l'engaschi voluntar dals giuvenils che contribueschan essenzialmain a l'organisaziun ed a la lavur da lobi, na fiss la participaziun da la giuventetgna betg garantida. La Sessiun dals giuvenils è in project da giuvenils per giuvenils. Ella porscha ad umans giuvens ina plattafurma per participar e cundecider e pussibilitescha ad els da surpigliar responsabladad.

La Sessiun dals giuvenils sco project inclusiv

Sco project inclusiv duai la Sessiun dals giuvenils esser averta per tut ils giuvenils. Ultra da sensibilisar per l'inclusiun e la discriminaziun determinescha ella ensemen cun ils giuvenils engaschads voluntarmain las valurs inclusivas da la Sessiun dals giuvenils. La Sessiun dals giuvenils na sa limitescha però betg ad ina contemplaziun discursiva, mabain sa stenta activamain per cuntanscher gruppas fin ussa sutrepreschentadas e sviluppa purschidas orientadas als basegns che pussibiliteschan ina participaziun reala.

La Sessiun dals giuvenils sco plattafurma da furmaziun

La Sessiun dals giuvenils pussibilitescha a la giuventetgna d'emprender d'enconuscher co che funcziuna la politica naziunala e da vesair co che funcziuna la furmaziun da l'opiniun politica en in rom real, ma nunsfurzà. Grazia a la Sessiun dals giuvenils sezza sco era grazia a las occurrenzas specificas che l'accumpognan pon ils giuvenils e las acturas ed ils acturs politics entrar en contact in cun l'auter e vegnir sensibilisads per las pussaivladads da l'engaschament politic e da l'engaschament en favur da la societad civila. Ultra da quai porscha la Sessiun dals giuvenils ina chaschun singulara a las voluntarias ed als voluntaris da visitar perfecziunaments attractivs e d'obtegnair certificats correspundents che servan sco cumprova da qualificaziun per champs d'activitad privats e professiunals.